Puem-Dem Fo Naija Languej (Issue 2)

Yeye smel by Eriata Oribhabor

 

stil de trowe fo di ‘rusty caps’ of Ibadan

na dost from puem of “Fist of Words”

wen skata from korekt “brains”…

plenti lain-dem wen de giv hop

to evribodi; revolushon

of tode – beta tumoro.

 

stil fo di old “street” of Ibadan

na plenti lain wen de mek pesin

du wok from insaid im bele

plenti lain wen fit kontrol evritin

fo Naija…rimuv wahala from

awa “streets” wen dem dekoret

wit yeye and shem.

 

stil plenti na dost of “Fists of Words”

“rhymes and rhythms” go de

Poshu yunivasiti

wen de faind hau to giv fud to gras

stil de luk fo magik of hau to wosh toilet.

If di noiz of smel from toilet-dem no stop,

wia bi di beta wen wi se wi bi?

 

stil de trowe from pipul, na plenti wori

of plenti kaind of tins fo awa land

wen dem put fo sainbod laik

majik wen go “free” ol of os

bot na chenj wen no fresh

na promis fo niuspepa

and telivision…

beta wen no get beta.

 

if dis revolushon de ron from di

botom of awa bele

and wi pomp am put fo awa “streets”

govment pipul go shek

awa eria of wahala go join bodi

to win wetin wi lost…awa “purse” to build

awa old “green” go “bright” egen

to finish yeye smel of “pain” and shem

and giv fud to ol awa pipul.

 

Na fo English Eriata Oribhabor dis puem wit STENCHES as di taitul bifo im kom chenj am to n Naija languej

 

12463816_1191714617524785_449416882_nEriata Oribhabor na puet wen de rait fo Naija languej and English Language. Im de du penti tins abaut puem and hau puem-dem go enta evribodi bodi fo Naija.

 

 

 

 

 

MAI PAPA NA FAMA

 

Fud boku fo mai papa haus brekete

Pipul de chop trowe fo im fam, nyanfun nyanfun

Nebo de kol mi ‘blesin’ pikin

Bot onga no gri mi rest

 

No fud to wak

No wota to drink

‘Egbe -weja’, im pawa no get ‘pat tu’

 

Dem ‘boko’ mai sista dem enta bush

Mai ai komot wota laik ‘ blood’

Bot mai papa no si enitin du

 

Mai papa na fama

Bot a de liv laik bega pikin

Onga don niali kil mi

Na wen dis sofa-hed go end?

 

AWODIYA FUNKE

20150910_090046Funke na “Medical sociologist”, shi de fait fo pipul we get “Sickle  Cell”  diziz, shi de rait an shi laik foto wel-wel.  Na shi de arenj di Eriata Oribhabor foto compitishon, dem don poblish ha puem dem fo difrent antoloji. Shi de wok on ha fest buk of puem dem.

 

 

 

 

 

 

 

 

PIJIN SWIT by Nwafor Eziafa Brenda

 

Pijin swit

Laik wain we fain

I de mek mai yan flou

Laik stret lain

 

Grama de dol mai stail

Na Pijin mek sens pas

A no de rimemba mistek

Bot to yan fo grama de mek mi ‘sweat’

 

Pijin shuo… pas jo

“Na dro sup a chop”

Hau a go tek tok am fo grama

Fo mi, grama don drop

 

Oyibo na grama

Pijin na to ondastand

Fo mi, grama na jara

Na pijin bi mai nomba wan

 

Pijin swit jare

I bi laik ‘Ogwo’ sup an ‘Stash’

I smut laik espres ‘road’

Infat, na ‘Ogbolo’ sup

 

A de skata maut tok

Mek mai maut fo no smel

A no bi ‘Oyibo’

So a no nid to de fom

 

A no bi ‘Obaiagbon’ (hu dash mi?)

A no bi Soyinka (a no rish)

Ivun sef, a no fit bi Achebe (fo wia?)

Mi, a bi Osas

 

Mek a tish yu smol:

“Talk” na “Yan”

“Craze” na “Kolo”

“Mummy” na “Male”

“Trouble” na “Gbege”

Oo “Kasala”

 

Shebi yu enjoi am?

A nou se yu enjoi am

 

Nwafor Eziafa Brenda

IMG_20151209_150726Brenda kom from Aniocha Saut Lokal Govament  fo insaid Delta Stet, bot na Lagos shi de liv.

 

 

 

 

 

 

 

 

 

 

 

 

 

 

One Reply to “Puem-Dem Fo Naija Languej (Issue 2)”

Leave a Reply